2Jo | KYG | STEP |

2 YONI

Yoni'a napa tu avo'mo kae'niye. Yagai'na ne'apatova vayatama vekamo'namo Goti'a lekana paino kate'niya a kano'e mafa'ne anagakamogi'efe'mo mani avo'mo nekaove, huno hu'niye. Yoni'a mago siosile'mo mai'naya vaya'aife'mo mani avo'mo kae'niye. Agaemo huno'ae'mo, Konagatimogife'mo lahau layamopafi'mo lahaino, huno huteno mago vaya'mogi lapakaetegamo alu gemo alini e'a lapa paisagetapae'mo alita falu hutapa o'apateyo, huno mani avo'mo kae'niye.

2 John

1 Nagaemo Goti vaya'ale'mo yagai'na ne'apatova vayatama vekamo'namo Goti'a lekana paino kate'niya a kano'e mafa'ne anagakamogi'efe'mo mani avo'mo nekaove. Nagaemo lapakaefe'mo lama ge ge'alefe'mo nahau nayamopafi'mo nahau'niye. Nagae'e muki vaya'mogimo lama gemo afi'naya vaya'mogi'e'mo lapakaefe'mo lahau layamopafi'mo lahau'niye. 2 Lama gemo laipafi'mo hane'niyanageno alagi hanege hanege huno haneno maigiya'mofe'mae. 3 Goti'a Afotimo'e Mafa'ne'amo Ala kava netimo Yesu Kalaisi'e'mo fiku lapa mae'ana lapamite'ana hanau hu'ana lapate'anageno'ao lapaipamo'mo falu hino.

4 Mago mafa'ne anagakamogimo muki ya'mo Afo'amo'a akame hiyo, huno laha pai'niya ke'aepa ge'amo lama ge'amo akame nehage'na apakete'nae'mo lusi kava hu'na namogaga ai'nove. 5 Ane, hu'na, kagaefe'mo aukaya hu'na ge hu'nae'mo, konagatimogife'mo lahaino. Mani gemo saufa ke'aepa gemo ohane'nifa hogoteno aepa faino laha pai'niya afinateti'mo afi'nona gemo hane'niye. 6 Gotife'mo lahau layamopafi'mo nelahaiya kava'mo Goti ke'aepa ge'amo akame nehuna kava'mo hane'niye. Ani gemo hogoteno aepa faino laha pai'niya afinateti'mo afi'naya gemo hane'niyanagi akame hiyo.

Kalaisi ge'ale'mo atafauta alagi hiyo, huno hu'niya gemae

7 Asole vaya'mogimo vaya'aife'mo humi ne'apataya vaya'mo ma mopafi'mo umenitata nehae. Apakaemo, Yesu Kalaisi'a ma mopafi vaya'ai agufamo aliteno vemo hamale'niye, hu'a ae'a hakalo nosae. Ani aigofe gemo nehaya vaya'mo Kalaisi kame vaya'amo mai'nae. 8 Alagepa miyatimo alisunafe'mo ali'ya'mo ali'none. Fiku yanageta o'aligunanagi alagepa hutapa yagaitapa maiyo alopa miyatimo aligunanagi. 9 Muki vaya'amogi Kalaisi'a alino apaya male'niya gele'mo atafau'a alagi hu'a o'mai'nisayana Goti'a avale'a apaipafi'mo ate'nae. Muki vaya'amogi Kalaisi'a alino apaya male'niya gele'mo atafau'a alagi hu'a ne'maisayana Goti'a avale'a apaipafi'mo ate'nageno mai'nigeno Mafa'ne'a'e'mo apaipafi'mo mai'niye. 10 Mago vekamo'a lapakaetegamo eno'ae'mo mani agufa gemo alinino no'mesiyana alita falu fala hutapa o'atetapa notapifi'mo avalelitapa o'viyo. 11 Hosu kava'amo'mo ali'a falu fala hu'a atesaya vaya'ai apakufale'mo aino kamaegaiye.

Ge atupa gemae

12 Nagaemo asole gemo avo kae'na lapa paisuvafe'mo nehuva'monanafa avo kaesuva yafe'mo o'nahaiye. Nagaemo lapakaetegamo u'na laugosamo alita magokepi anupa hutetae'mo lusi kava huta lamogaga aisunafe'mo nahau'niye. 13 Goti'a kaganakamo'mo lekana paino ate'niya kaganakamo mafa'ne anaga'amogimo ge lapamamae'nae. He, lama ge.